Pigsierto kan Metropolitan Naga Water District (MNWD) na normal pa man giraray an suplay nin tubig sa Naga City asin sa mga karatig na lugar maski sa grabeng init kan panahon asin sa banta kan matinding El Niño.
Sa intrevista kan Bombo Radyo Naga ki Choppy Dy-Liacco Dela Cruz (Public Information Officer, Metropolitan Naga Water District), sinabi kaini na mayo pang nararanasang water interruption o rationing ngunyan
an mga pangenot na water sources ninda arog kan spring asin pumping stations an nasa normal pang lebel.
Segun ki De la Cruz, preparado na an ahensya para sa epekto kan El Niño na posibleng mamatian sa ikatulong quarter kan taon. Sa ngunyan, tinatapos na kan MNWD an pitong pumping stations na magseserbing dugang na suplay nin tubig sakaling magbaba an water level. Tolo na sa mga nasabing pumping stations an 100% nang tapos sa civil works, alagad pighahalat pa an pag-install kan electromechanical components arog kan panel boards asin iba pang pasilidad bago ini magamit.
Dugang pa kaini, an mga spring sources arog kan Anayan asin Rumangrap ngunyan nasa above normal level pa asin may overflow pa, senyales na maray an replenishment hale sa uran kan nakaagi na tao. Alaga, piglalaomanan posibleng pagbaba kan water level pag-abot kan Mayo hasta Hunyo.
Minarhay man kan MNWD na may mga barangay sa Metro Naga na nagkakaigwa nin intermittent water supply, kabilang an Sabang, Abella, Igualdad asin parte kan Sta. Cruz. Ini dahil sa kakulangan sa transmission lines na pigpaplano pang itugdok.
Pigheras pa kaini na paramientras na napauktaba an ibang proyekto sa pipeline expansion huli sa pagtaas kan presyo kan petroleum products na ginagamit sa PVC pipes.
Komo preparasyon may tolong standby pumping stations an MNWD na puwedeng paandaron giraray kung kaipuhan. May mga water lorries man na ginagamit sa distribusyon nin tubig sa mga apektadong lugar.
Padagos man an koordinasyon kan MNWD sa mga ahensya arog kan National Irrigation Administration (NIA) para sa posibleng paggamit nin surface water sources, habang hinahalat pa an pag-apruba kan memorandum of agreement.
Sa isyu kan water rate increase, nilinaw kan MNWD na dati na ining inaplayan asin bako ini direkta dahil sa oil crisis. Sakaling maaprubahan, pigsierto kaini na ninda imamantinir ining saro sa pinakamababang water rates sa rehiyon.
Nagpagirumdom man an opisyal sa publiko na magtipid sa paggamit nin tubig, lalo na sa mga bako man importante na gamit. Inirekomenda man an reuse kan tubig hale sa paghuhugas asin paglalaba para sa pagdidilig.
Para sa mga reklamo o report kan leakages asin illegal connections, hinahagad an publiko na makipag-ugnayan sa MNWD hotline tanganing madali ini maaksiyunan.
