Pigsierto kan Department of Health (DOH) kan nakalihis na aldaw nin Biyernes, Abril 18, na an mga kaso kan Mpox na naireport kan Davao City Health Office an gikan sa Clade II variant kan virus na dae peligruso kumparar sa mga naenot na report.
Sigun sa DOH, nagtitinir sa parehong antas an peligro alagad nilinaw man kan ahensya na an pasyenteng binawian nin buhay an bako huli mismo sa Mpox, kundi sa komplikasyong may kinaraman sa saiyang matinding kundisyon.
Dugang pa kan DOH, epektibo an presenteng mga lakdang sa pagsimbag sa Mpox. Tulos na na-detect asin na-isolate an mga kaso, mantang binabantayan an gabos nin nairehitrong close contacts.
Sa tahaw kan pagkomemorar kan Semana Santa, sinabi kan DOH na salbado pa man na makisumaro sa mga aktibidad siring kan nakalihis na Biyernes Santo asin man sa nararani na Easter Sunday.
Ipinaliwanag man kan DOH na karaniwang sintomas kan Mpox an mga pantal sa kublit o mucosal lesions na naghahaloy nin duwa hasta sa apat na semana, kasabay kan kalintura, pangungulog ni payo asin lawas, panglulya, asin pamamaga nin kulani.
Posible na makua an Mpox sa haranihang kontak sa taong may impeksyon, paggamit nin kontaminadong gamit, o sa hayop na may virus. Kaya man abiso pa kan DOH gumamit nin sabon asin tubig, asin magsulot nin gloves enkaso naghuhugas nin gamit.
Sinabi kan DOH na an pagbulong sa Mpox ay supportive care. Kun mayo nin ibang pigmamati, pwede man na magparahay sa harong an pasyente hasta sa mahali an gabos nin scabs asin magkaigwa nin panibagong layer an kublit.
