·
NAGA CITY- Puspusan an pigsasagibong lakdang kan lokal na gobierno kan siyudad nin Naga tanganing mai-adaptar na an digitalized flood mitigation system na naggagamit nin Hydrologic Engineering Center-Hydrologic Modeling System (HEC-HMS).
Ini an sarong US-military-developed software tanganing makapag-kriar nin marekas, tama asin mas episyenteng paagi tanganing masimbagan an pagbaha.
Susog sa kamawotan ni Naga City Mayor Leni Robredo na baguhon an siyudad, an City Disaster Risk Reduction Management Office (CDRRMO), City Engineering Office (CEO), Environmental and Natural Resources Office (ENRO), asin mga eksperto na environmental engineers an matarabangan tanganing magkolektar nin data gikan sa Naga River asin isusumiter sa Hydrologic Engineering Center-Hydrologic Modeling System software.
An siyudad an sistematikong i-aanalisar asin gagamiton an data na naguno kan software komo giya para sa pagplano kan flood control asin river rehabilitation projects.
An proyekto na ini an piglalaoman na makakakriar nin supisyenteng waterway spaces na magseserbeng dalan tanganing mas orog na makadaloy an tubig pasiring sa dagat na potensyal na paagi tanganing mapababa an peligro kan pagbaha.
Sa ngunyan, kadakol pang mga proseso asin pag-aadal an ginigibo tanganing masimbagan na an problema sa pagbaha sa siyudad sa paagi kan nasambitan ng sistema.
