Nahiling na kan militar an nagbagsak na FA-50 fighter jet kan Philippine Air Force (PAF) ngunyan na aldaw nin Miyerkules, Marso 5, sa Mt. Kalatungan mountain range sa Bukidnon makalihis na mawara ini sa tahaw kan sarong tactical night operation.
Pigkumpirmar ni Lt. Gen. Luis Rex Bergante, commander kan Eastern Mindanao Command, na nahiling an eroplano bandang alas 11 nin pagkaaga. Nadukayan man kan search and rescue teams an duwang pilotong lunad kaini na kumpirmadong gadan.
Binisto an mga ini na sinda Major Jude Salang-Oy asin 1Lt. April John Dadulla.
Sigun ki Bergante, pig aapod na “total wreck” an nagin kamugtakan na kan nasambitan ng eroplano. An FA-50 an nagtatao nin air support sa tropang militar na nagreresolbar sa mga rebeldeng New People’s Army (NPA) sa Bukidnon.
Nagkaigwa nin sagupaan sa banwaan kan Cabanglasan kan nakalihis na aldaw nin Martes na matanga, rason man kun tano dae tulos pigbuyagyag kan Philippine Air Force an posibleng lokasyon kan jet tangani na siertuhon na maeenot an mga rescuers sa crash site antes an mga rebelde.
Sigun ki PAF spokesperson Col. Ma Consuelo Castillo, nawaran nin komunikasyon an FA-50 mantang pasiring sa target area.
Nakatabang sa pagtukoy kan lokasyon kan crash site an signal na gikan sa personal locator beacons kan mga piloto.
Pigladawan an lugar komo “mabundok, masukal, asin mahamog.” Pigsagibo na an imbestigasyon tangani aramon an kawsa kan nasambitan ng pagbagsak.
Bagaman igwa nin kakayahan an FA-50 sa night operations asin bihasa an mga piloto, aminado si Castillo na igwa nin matinding peligro an paglupad sa banggi.
Huli man sa insidente, paramientras grounded an natatadang 11 FA-50 fighter jets kan PAF. An mga aircraft na ini, na binakal gikan South Korea kan nakalihis na taong 2015 hasta 2017 sa kantidad na P18.9 bilyon, an importanteng parte kan anti-insurgency operations asin patrolya sa West Philippine Sea.
Dakula man an nagin papel kan FA-50 sa 2017 Marawi siege komo suporta sa ground troops kontra sa mga terorista.
