Nadugangan pa an numero kan mga kumpirmadong election related incidents na nairehistro kan Philippine National Police sa nakalihis na halalan ngunyan na taon.
Basado sa datos kan Pambansang Pulisya, nagpakol na ini sa kabilugang 74 validated election-related incidents.
An numero na ini an gikan sa kabilugang 171 insidente na nairehistro kan nakalihis na eleksyon kun saen 74 sana digde an nakumpirmang election-related incidents. Susog sa PNP, maabot man sa 43 an nairehistrong suspected ERI.
Sa sarong pahayag ay sinaysay ni PNP Public Information Office Chief PCol. Randulf Tuaño, gikan sa 74 validated election-related incidents, pinakadakol digde iyo an mga kaso nin pangbabadil na nag abot na sa 27.
Apwera man digde ay nairehistro man an mga kaso kan pangungulog, pananakot, panggigipit, asin ibang mga klase nin kadahasan na nangyari sa bilog na panahon kan 2025 midterm elections.
Mas hababa man an validated election-related incidents na nairehistro ngunyan na 2025 kumparar sa parehong kaso na nairehistro kan nakalihis na duwang taon.
