Pinapawarang bisa ngunyan kan National Police Commission (NAPOLCOM) an mga nagin pagbabago sa mga key officials kan Philippine National Police (PNP) makalihis an nagin mahewasang balasahan sa laog kan organisasyon.
Sigun sa iniluwas na resolusyon kan NAPOLCOM na Resolution 2025-0531, pinagsusugo kan komisyon na ibalik komo Deputy Chief for Administration si PLtGen. Jose Melencio Nartatez mantang si PLtGen. Bernard Banac man an inatasang ibalik komo Commander kan Area Police Command (APC) Western Mindanao.
Nakabugtak man sa resolusyon na an mga kasuguan na ini an susog sa Section 6 Article 16 of the 1987 Constitution na nagtatao nin kapangyarihan sa NAPOLCOM na na pangasiwaan asin kontrolon an Pambansang Pulisya asin mamantinir an sarong pakarhay na pwersa kan pulisya.
Sigun pa sa resolusyon, bagaman igwa nin kapangyarihan an hepe kan PNP na magtalaga nin mga opisyal asin magpautob nin mahewasang rigodon, pinagsusugo man sa irarom kan Section 26 Republic Act 6975 na igwa man nin kapangyarihan an NAPOLCOm, na i-review, aprubaran asin baguhon an mga siring na direktiba.
Pigtawan duon man sa resolusyon na an mga panibagong pagtatalaga ni PNP Chief PGen. Nicolas Torre III an dae nagsasairarom asin man dae nag agi sa NAPOLCOM En Banc na iyong dapat pangasiwaan ni Department of Interior and Local Government (DILG) Secretary Jonvic Remulla.
Sa ibong man kan nagin resolusyon kan komisyon, nanaindugan an kadaklan sa pulisya na suportado ninda an mga nagin desisyon ni Torre asin man an nagin pagtatalaga kaini. Mientrastanto, nagtitinir man na tikom sa ngunyan an nagin lado kan PNP mantang paramientras na pig-untok an mahewasang balasahan sa organisasyon.
