Nakatalaan na ilunsar an sarong nationwide school-based immunization program r kan Department of Health (DOH), sa pakikipagtabangan kan Department of Education (DepEd) sa mga eskwelahan sa maabot na Oktubre.
Sigun ki Health Secretary Teodoro Herbosa, mapoon na sinda sa Oktubre 7 kan Vaccination-Eskwela program para matawan nin bakuna an mga estudyante sa primero, ikaapat asin ikapitong grado kontra sa HPV, tigdas, Rubella, tetanus, asin diphtheria.
Sa irarom kan programa, pwedeng magpabakuna an mga kaakian kada Biyernes sa bilog na bulan nin Oktubre, sa gabos na pampublikong eskwelahan, alagad welcome man an mga estudyante hale sa pribadong eskwelahan asin pwedeng magpabakuna.
Tulos man na piglinaw kan sekretarya na bako mandatory an siring na pagbakuna asin kinakaipuhan an pagtugot kan mga magurang kan mga estudyante.
