Nanindugan si Jimmy Santiago Director kan National Bureau of Investigation na dae ninda ipapadara an saindang mga kahaputan ki VP Sara Duterte.
Kan nakalihis na aldaw nin Byernes, nakatalaan na kuta an enot na imbestigasyon kan NBI sa kontrobersyal na pahayag ni Duterte dapit sa paggadan ki PBBM, First Lady Liza Marcos asin House Speaker Martin Romualdez alagad dae nagpahiling an bise presidente.
Hinagad kan kampo ni Duterte na i-oktaba an saiyang pag-atendir. An saiyang kampo naghagad man nin kopya kan mga kahaputan na pwedeng ihapot kan panel, kaiba an kopya kan reklamo na isinangat laban saiya.
Alagad segun ki Dir. Santiago, dae ninda pwedeng itao an kahagadan ni VP Sara para sa kopya kan mga hapot.
An pwede sanang itao kan NBI iyo an kopya kan reklamo, mantang saro sanang hapot an pwedeng iabante ki Duterte, asin ini kun sisay an nagbabanta sa saiyang buhay.
Segun ki Dir. Santiago, igwa pa nin hasta sa Dec. 11 para sa ikaduwang kampo kan presidente na mag-andam.
Alagad kun dae na liwat magpahiling si VP Sara sa petsang iyan na mayong balidong rason, abiso, o magkakanigong kahagadan para sa saro pang re-schedule, mapipiritan suboot an NBI na ipadagos an imbestigasyon asin ipaabot an rekomendasyon sa Department of Justice.
Pigsierto kan dating judge na magigin patas an isasagibong imbestigasyon asin dadangogon kan NBI an gabos na argumento ni VP Sara Duterte.
