NAGA CITY-Pigbunyag kan National Bureau of Investigation(NBI) na igwa nin ikatolong Alice Guo na nag-apply nin NBI clearance sa ciudad nin Quezon kan taong 2005.
Sa sarong press conference katakod kan kaso ni Bamban Mayor Alice Guo, pigsambit ni NBI Director Jaime Santiago na kan surion an lugar kung saen nakaistar an nasambitang indibidwal na naka-record, dai soboot nagi-exist an nasambitang Alice Guo.
Sa ngunyan, pig-aaram pa kan mga awtoridad an dugang na detalyes katakod kan pagkakabistuhan kan natukoy na ikatolong Alice Guo.
Mientrastanto, nakatalaan man ipaluwas kan NBI an resulta kan fingerprints examination sa indibidwal na may kaparehong pangaran ki suspended Bamban Mayor Alice Guo na presenteng pig-iimbestigaran huli sa kwestyonableng identity kaini.
Sigun ki NBI Dir. Santiago, anuman an magigin resulta, dai soboot ini makakaapektar sa naenot na findings kan NBI kun sain nagtugma an fingerprints kan suspendidong alkalde sa Chinese national na si Guo Hua Ping.
Marurumduman na pigpresentar ni Sen. Risa Hontiveros an sarong NBI clearance kan sarong babaeng nagngangarang Alice Leal Guo na may parehong birth province asin kompleanyo ki Bamban Mayor Alice Guo alagad magkaiba sana an ladawan, kun sain naglutang an posibilidad na stolen identity nin sarong Pilipino an pig-gagamit kaini.
