Padagos an pigkokondusir na imbestigasyon kan National Police Commission (NAPOLCOM) sa sarong insidente na imbwelto an sarong pulis sa Barangay Pinaparancha, kun sain binawian nin buhay an sarong indibidwal.
Sa intrevista kan Bombo Radyo Naga ki Police Lieutenant Colonel Elmer R Azures Jr., Public Information Officer kan Naga City Police Office, sinaysay kaini na isinangat kasuodma sa opisina kan piskal an katumbas na kaso kontra sa suspek.
Mientrastanto, sinabi kaini na parte kan mandato kan NAPOLCOM iyo an administrative control asin operational supervision kan Philippine National Police (PNP), kabale na an kapangyarihan na magsagibo nin imbestigasyon asin aksyonan an mga reklamo dapit sa kapabayaan o pagbalga sa trabaho kan mga pulis.
Saiyang ipinaliwanag na sa mga insidente na imbwelto an mga pulis, pig-eeksamin kan NAPOLCOM kun tama asin susog sa proseso an ginibo kan mga awtoridad. Kun mapatunayan na igwa nin sala o kapabayaan, ini an pwedeng magin basehan sa pagsangat kan katumbas na kaso administratibo.
Piglinaw man kaini na bako sana an suspechado an pwedeng imbuelto sa imbestigasyon. Pig-eeksamin man an mga aksyon kan police station asin mga personahes na posibleng responsable, lalo na kung mapatunayan na iguang kapabayaan sa imbestigasyon.
Dugang pa ni Azures, igwa nin awtoridad an NAPOLCOM na magkondusir nin sadiring imbestigasyon asin maggibo nin magkakanigong lakdang enkaso may mahihiling na problema o kakulangan sa pag-asikaso kan kaso.
Mientrastanto, manungod sa posibleng paghale kan mga napatunayan na nagpabaya, nakadepende suboot ini sa rekomendasyon kan imbestigador asin sa gigibuhon na lakdang kan liderato kan PNP.
Sa ngonian, pig-iimbestigaran pa an insidente tangani na maaraman kun igwa nin anuman na pagbalgar o kapabayaan sa mga kapulisan na posibleng magdara nin magkakanigong paninimbagan administratibo.
