Masagibo nin Final Walkthrough ngunyan na aldaw an NCPO sa magiging ruta para sa traslacion sa Biyernes, magigirumduman na nagsagibo nin Initial Walkthrough an NCPO kan petsa 2 asin 3 ngunyan na bulan kun sain napag araman na may mga Minimal Hazards sa magiging ruta.
Sa intrevista kan Bombo Radyo Naga ki Police Lieutenant Colonel Elmer R. Azurez Jr. inihiras kaini an preparasyon sa paparani na traslacion kabali na digdi an gigibuhon na paglinig asin pagpahali kan sasakyan o ano man na klase nin olang sa mga tinampong aagihan kan Traslacion procession bago mag alas 9:00 nin aga sa Setyembre 11, 2026. An rota kan traslacion iyo an Penafrancia Avenue, P. Burgos, Elias Angeles, Iglesia Road pasiring sa entrada kan Porta Mariae.
Segun ki Col. Azurez, may total na poco mos omenos 2,000 na pulis na ide-deploy komo bantay sa trapiko asin ma responde sa mga dae inaasahan na aksidente.Tulos man idadakop kun may manyari na harabonan asin iba pang krimen.
Kun may mag pasiway man na maykagsadiri kan awto tulos ining titiketan asin may katakod na penalidad. Tig konsiderar man an gabos na ruta na high-risk sa pwedeng may manyari tanganing tulos na makapag andam an mga kapulisan. Sa presente, may tigtatakod na mga CCTV sa mga nasambitang lugar asin gagaramiton na drone para mas mabantayan an seguridad.
Mientrastanto, kan nakalihis na semana nagsagibo na an kapulisan nin OPLAN Galugad o OPLAN Bulabog kun sain naglilibot an mga kapulisan tanganing ma monitor an kapalibutan asin mas pinaintig man sangat kan Warrant of Arrest sa mga bistadong personahe na may katakod sa kasong Robbery and Theft tanganing malikayan an mga arog kaining gawe sa misming ka piyestahi.
