Liwat na pig-sierto kan Naga City Police Office (NCPO) an saindang marikas asin mahiwas na pagresponde sa nangyaring panggagadan sa sarong paratukdo kan Ateneo de Naga University makalihis na madakop an suspek sa laog sana nin haros 48 oras makalihis an insidente.
Sa paghampang sa mga kagawad kan Media ni Naga City Mayor Leni Robredo, tinawan nin komendasyon kaini an mga imbestigador kan Police Station 4, partikular na si PSSg. Raymond Ian Periña Kimio asin PCMS Corina Aquino, sa saindang dedikasyon sa pagresolber kan kaso. Segun sa mga opisyal, halos duwang aldaw sindang nagtrabaho na mayong pahingalo tanganing maparikas an imbestigasyon.
Segun ki City Director Col.Rizaldi Caballero, nagpapadagos pa an case build-up asin evidence gathering ngani na masierto na masasangatan nin makusog na kaso an suspechado. Dugang pa kaini, an nagpapadagos na imbestigasyon nakabase sa ebidensya asin sa ley.
Nagluluwas sa imbestigasyon na dakula an naitabang kan CCTV camera footage sa pagbisto kan suspechado, sa ibong kan pagprobar kaini na raoton an saro sa mga camera. An ibang importanteng ebidensya yaon pa sa irarom kan pagsiyasat kan SOCO.
Mientrastanto, an gobyerno kan ciudad nag-anunsyo nin mga plano na pakusugon an seguridad sa lugar sa paagi nin pagdugang nin police outpost, mas dakol na CCTV camera, asin pakikipagtabangan sa mga asosasyon nin mga kagsadiri nin harong asin mga developer tanganing mapakarhay an ilaw, seguridad, asin kaligtasan kan mga residente.
