NAGA CITY- Preparado soboot an Naga City Police Office na magtao nin asistensiya sa publiko sa anuman na kalamidad na kawsa kan bagyo.
Sa nagin paghampang sa mga kagawad kan media ni PLTCOL. Chester Pomar an tagapagtaram kan NCPO, sinaysay kaini na yaon an presensiya kan mga kapulisan sa panahon kan mga distroso asin preparado na magtabang sa anuman na oras.
Sigun pa sa opisyal, dae mahahali an lado kan kapulisan sa siring na pagkakataon nin huli ta importante an kada minuto sa pagsalbar kan buhay.
Sa ibong na lado, antes man an pag-abot ni DILG Sec. Behhur Abalos Jr sa Naga City nagkaigwa nin closed meeting tanganing masierto an kasalbaduhan kan opisyal.
Katakod digde, puon sa airport hasta sa pagpasiring kaini sa Naga City, Camaligan, Canaman igwang nakasunod na convoy siringman igwang nakabantay na mga kapulisan sa pig-agihan ni Abalos.
Huli sa saindang mahigot na pagbabantay nagin matrayumpo man an nasambitan ng pagbisita kan DILG secretary sa siyudad asin iba pang lugar tanganing magpa-abot nin tabang sa mga naapektaran kan bagyo.
Sa ngunyan, preparado naman soboot an NCPO asin pighahalat na sana an pag-abot kan saindang augmentation force para sa dugang na seguridad.
Alagad, piglinaw man ni Pomar na yaon sana an mga ini enkaso igwang dakulang aktibidad na ikukundusir o mga VIP na maabot sa siyudad.
