Pigbubusol ngunyan ni Israeli Prime Minister Benjamin Netanyahu an sarong “military solution” tangani maisalbar an pigkakarkulong 20 na natatadang hostages na kapot pa man kan Hamas magpuon pa kan nakalihis na Oktubre 7, 2023.
Sigun sa report, sinaysay kan sarong opisyal kan Israel na nagpapadagos an koneksyon sa pag-ultanan kan Israel asin man Estados Unidos, huli ta malinaw na soboot na dae interesado an Hamas sa kasunduan dapit sa pagpapalaya kan mga Israeli hostages.
Huli man digde, mawot ni Netanyahu na palawakon pa an mga operasyong militar sa Gaza tangani sapiritang palayaon an mga bihag.
Marurumdumang nagprotesta an rinibong kahimanwa sa Tel Aviv kan nakalihis na Sabado tangani hagadaon sa gobyerno na tapuson na an giyera asin tulos na ibalik an mga natatadang bihag.
Kasabay kaini, naglangkaw an pangkinabang pagkahadit sa naglalang krisis sa gutom sa Gaza. Sigun sa Hamas-run Gaza Health Ministry, labi sa 175 katao na, kabali an 93 mga aki, an nagadan na sa malnutrisyon.
Bagaman pighurot kan Israel na bastante an saindang piglaog na humanitarian aid, sinaysay kan mga international organization na dae man giraray ini bastanet, asin nagkapirang lugar sa Gaza an pwedeng tamaan nin taggutom.
