NAGA CITY- Posibleng parte suboot kan paparaning anibersaryo kan rebeldeng New People’s Army (NPA) an napugulan na planong pag-atake sa sarong establisimiento sa banwaan nin Balayan, Batangas na nagresulta sa bakbakan sa pagultanan kan mga ini asin kan mga militar.
Ini an sinaysay ni Capt. Patrick Jay Retumban, pamayo kan Division of Public Affairs Office (DPAO) kan 2nd Infantry Division, Philippine Army sa entrevista kan Bombo Radyo Naga.
Segun ki Retumban, igwang nakaabot na impormasyon sa mga militar na nagpaplano suboot an mga rebelde na mag-atake sa sarong establisimiento sa nasambitang lugar komo parte kan saindang propaganda sa saindang anibersaryo sa Marso 29.
Dugang pa ni Retumban, obheto pa kan mga rebelde na maipahiling na igwa pa sindang presensya sa area.
Katakod kaini, tinawan doon kan Philippine Army na nakaandam an saindang linyada katabang an Philippine National Police (PNP) tangani na mapugulan an posibleng pag-atake kan NPA komo parte kan saindang papaabuton na anibersaryo.
Mientrastanto, pigsierto man kan opisyal na padagos an operasyon kan saindang linyada tangani na lapagon an mga miembros kan nagdurulag na NPA na nakabakbakan kan mga otoridad sa banwaan nin Balayan na nagresulta sa pagkakairido kan duwang soldados.
