Padagos pa man na ikinukunsiderar kan Office of the Ombudsman an implementasyon kan ‘restitution’ para sa mga kaso patungkol sa flood control projects anomaly.
Pigheras mismo ni Ombudsman Jesus Crispin ‘Boying’ Remulla an obheto na nakipag-koordinar sa hudikatura tangani maipautob an pagbabalik kan mga kwartang nakua sa korapsyon.
Soboot pigsusuhestyon kaini sa kaukulang korte o hudikatura tangani maaraman kun ano an posibleng magin epekto kaini sa mga kaso.
Kasaro man kaini an saiyang pagtubod na mas marikas soboot maipapautob an ‘restitution’ enkaso man maglaog sa ‘plea bargaining’ an imbwelto na indibidwal.
Mientrastanto, aprubado asin dae man tutol si Ombudsman Boying Remulla sa mga pulitikong boluntaryong isinapubliko an saindang Statement of Assets, Liabilities and Net Worth o SALN kasunod kan maihapot kan Bombo Radyo Philippines an saiyang reaksyon dapit digde.
Alagad saiya man na pighurot na bagaman igwa nin nagkapirang opisyal an naggibo kaini, soboot dae kaini isusugo o ii-impose ini sa gabos.
Kanya-kanya soboot ining desisyon sa obheto na magin transparent o gibuhong mas bukas sa paninimbagan an mga pampublikong opisyal.
Sigun pa ki Ombudsman Remulla, an nasambitan ng dokumento an gagamiton kan tanggapan komo ‘tool’ para sa implementasyon kan ‘lifestyle check’.
Mantang hinamon ni Ombudsman Remulla an mga kongresista na pumili sana nin saro kun sinda an masirbi o magnenegosyo. ‘Conflict of interest’ pa kaya soboot na maikokonsiderar sa sarong lehislador na nangingiaram sa kontrata o may koneksyon sa negosyo dawa pa ‘in good faith’ pa an nasambitan ng opisyal.
