NAGA CITY– Dae nakasalbar an mismong headquarter kan Philippine Coast Guard (PCG) sa banwaan kan Pasacao, Camarines Sur sa nangyaring storm surge na naghalon sa 15 kahaharongan mantang 11 iba pa an partially damaged.
Sa entrevista kan Bombo Radyo Naga ki Petty Officer 1st Class Graciano Cañeba, sub-station commander kan PCG-Pasacao, kinumpirmar kaini na hinalon man kan storm surge an saindang opisina.
Sinaysay ni Cañeda na dae sinda nakaluwas tolos huli sa mga nakabakat na cocolumber sa luwas kan headquarter na nagbagsak huli sa kusog kan duros.
Alagad makalihis na magkalma an kadagatan, tolos naman sindang nagresonde sa Barangay San Sirilo kun saen nagkapirang kahaharongan an nagaba kan mga hukol.
Mientrastanto siniyerto kan lokal na gobyerno kan Pasacao, Camarines an tabang sa mga pamilyang naapektaran kan storm surge.
Sigun ki Kapitan Lorenzo Bea, dawa 15 kaharongan an nagaba kan storm surge alagad mayo man na natalaan na casualty sa nangyari
Sa ngunyan, temporaryong nagtitinir an mga apektadong pamilya sa kapilya kan barangay.
