NAGA CITY – Piglinaw kan pamayuhan kan Office of the Senior Citizens Affairs kan syudad nin Naga na pigpapasa ninda sa City Social Welfare and Development Office an listahan kan mga senior citizens sa syudad nin Naga asin an mga ini man an igwa nin pinal na desisyon kun magigin benipisyaryo ba an mga ini kan mga programa kan gobierno.
Sa entrevista kan Bombo Radyo Naga ki Jimmy Reblando, pamayo kan OSCA, sinaysay kaini na an CSWDO an igwa nin karapatan na mag-imbestigar dapit digdi.
An trabaho sana soboot kan saindang opisina an mag check kun totoo ba an mga ID na piggagamit asin pagpapaliwanag kan mga programa asin proseso na dae naiintindihan kan mga senior citizen.
Alagad pag-abot sa pagdedesisyon kun sisay an magigin benipisyaryo an baku nang sakop kan saindang hurisdiksyon.
An nasambitan ng pahayag an kasunod kan mga reklamo na igwa nin mga senior citizens na nakakaresibe nin dobleng ayuda gikan sa gobierno.
Igwa kaya soboot nin mga senior na nakakakua na nin pension sa SSS alagad nakabali pa sa mga benipisyaryo kan Social Pension na P1000 na hali naman sa DSWD.
Enkaso man na mapatotoohan na doble an pensyon na nareresibe kan sarong senior an kinakaipuhan ining halion sa listahan tanganing matawan nin pagkakataon an iba na makabali digdi.
Sa ibong na lado, pig-enkaminar man kan opisyal an lambang senior citizen na magpalista na tanganing manginabang sa mga siring na programa para sa sainda na makakatabang sa saindang pang-urualdaw na pangangaipuhan.
