Ipigtutulod kan pamayuhan kan Ocampo Camsur an posibilidad na madagdagan an pension kan mga kwalipikadong senior citizen na empleyado kan barangay kasabay kan selebrasyon kan 68 mag-agom na nabenepisyaran kan ika-duwang taon kan Libreng Golden Wedding Celebration kan banwaan.
Sigon ki Mayor Ronald Allan Go an mga mag-agom na dekada ng nag-iibanan asin padagos na pinapakusog an saindang pamilya, importanteng tawan nin pagbisto an saindang pagkaminootan sa ibong kan mga angat sa buhay.
Sigon pa sa alkalde, nasa 72 na couples an benepisyaryo kan libreng kasal kan nakalihis na taon, mantang 68 mag-agom man an nakisumaro sa selebrasyon ngunian na taon.
Tampok sa aktibidad an mga mag-agom na nakaabot sa 50 taon nin pagkaminootan asin pag-ibanan.
Mientrastanto, ipinahayag man ni Go an saiyang kamawotan na madagdagan an pension o benepisyo kan mga barangay officials na 70 anyos pataas asin padagos pa man na nagsiserbi sa saindang mga barangay.
Sa presente igwang mga kwalipikadong senior citizens na an nakakaresiber nin ₱500 na bulanan na pension gikan sa national government asin kamawotan kaining mapag-adalan kun posible pang madagdagan ini tanganing makatabang sa saindang pang-arualdaw na pangangaipo.
Tinawan-doon ni Go na importante an padagos na pakikipagtabangan kan mga barangay officials asin lokal na gobyerno tanganing masimbagan an mga pangangaipuhan kan mga residentes sa banwaan nin Ocampo Camsur.
