Pig-insister kan House prosecution na kaipuhan pa man giraray na ipaliwanag ni Vice President Sara Duterte an umano’y P463.04-milyong yaman dawa pa waraon sa kuwenta an mga asset kan mga kumpanyang iniuugnay saiya asin sa agom niyang si Atty. Manases “Mans” Carpio.
Segun ki House prosecution spokesperson asin Rep. Zia Alonto Adiong, an kantidad na ini parte kan P817.87-milyong tantiya kan forensic accounting expert na si ATTY Alexander Cabrera sa umano’y dai idineklarang asset asin dai maipaliwanag na yaman kan mag-agom poon 2022 sagkod 2025.
Kaiba sa sinuri ni Cabrera an mga bank deposit, ari-arian, posibleng dai idineklarang kita asin interes sa mga kumpanyang Metro City Chow Foods Corp., Gencorp Industries Inc. asin Cale88 Foods Corp. Kinuwestiyon man kan depensa kun dapat isama sa personal na yaman kan mag-agom an mga asset asin transaksiyon kan mga kumpanyang ini.
Segun sa prosecution, igwa man umanong mga deposito na dai nakalista sa Statement of Assets, Liabilities and Net Worth o SALN ni Duterte, siring man an mga pagkakaiba sa saiyang idineklarang kita asin iba pang rekord pinansyal. Minsan siring, alegasyon pa sana an P463-milyong kantidad asin dai pa ini pinal na napatutunayan kan Senate impeachment court. Pigdeni ni Duterte an anuman na pagkakamali, mantang kinuwestiyon kan saiyang mga abogado an ebidensiya kan prosecution.
An Article II na sana, na nagtutukar sa umano’y dai maipaliwanag na yaman, an natatada sa impeachment case matapos bawi’on kan House prosecution an tulong iba pang kaso. Pig-lalaoman napupuonan kan depensa an pagpresentar nin ebidensiya sa masunod na pagdangog sa Nobyembre 9.
