Pigpautob kan Department of the Interior and Local Government (DILG) an direktiba sa irarom kan Memorandum Circular 2026-066 na iniluwas kan nakalihis na Enero 29, an pagbabawal sa pagbubugtak kan pangaran, ladawan, imahe, slogan, logo, mga inisyal asin iba pang simbolo na pwedeng ikonektar sa sisay man na opisyal kan gobyerno sa mga proyekto asin karatula kan gobyerno.
Pigtawan-duon kan DILG na na mga programang pinondohan kan gobyerno an gikan sa buwis kan mamamayan asin dae dapat gamiton komo personal na kasangkapan sa pamumulitika, kun kaya pigsugo man kan ahensiya an tulos na paghali kan mga nag-iiral na materyales na dae nagsusunod sa panundonan.
Katakod kaini, nagpahayag si Senate President Pro Tempore Panfilo “Ping” Lacson kan saiyang bilog na suporta sa deriktiba asin pighurot na dae nararapat sa serbisyo publiko an mga billboard asin karatulang naglalaog nin lalawgon asin pangarann kan mga pulitiko, huli ta nagigin paagi ini kan pag-aangkin kan krideto asin pwede man ining magpahiwatig kan katiwalian o labing paggastos bako sanang sa mismong proyekto kundi magin sa mga karatula na pigpapaskilan kan mga lalawgon asin pangaran kan pulitiko.
Dugang pa kan senador, an pambansang budget an dapat magsirbi sa interes kan publiko asin dae gamiton komo kasangkapan para sa pansadiring kapakinabangan kan mga nasa kapangyarihan.
Pigtawan-duon man kan opisyal an haloy na kaining pagbusol sa paghihigot kontra sa mga gibuhing “epal” kaibahan an pagbubugtak nin mas malinaw na safeguards sa 2026 national budget tanganing malikayan an political patronage asin pang-aabuso sa pondo kan bayan.
