Nagtutubod si Batangas 2nd District Rep. Gerville Luistro na mapapakusog an moral kan mga miyembro kan Lakas-CMD an pagsali ni House Majority Leader Sandro Marcos sa partido, kasunod kan pagkaaresto asin pagkakakulong ni dating House Speaker Martin Romualdez huli sa sarong plunder case.
Kinumpirma ninda Luistro asin House Deputy Speaker Janette Garin kan Huwebes an pagbalyo kan aki ni Pangulong Ferdinand Marcos Jr. sa nasabing partido.
Segun ki Luistro, makakatabang an presensya ni Sandro, bilang majority leader asin aki kan Pangulo, tanganing mapakusog an kumpiyansa kan mga miyembro.
Marhay man na inako ni Garin an bagong miyembro asin sinabing bukas an partido sa mga hoben na makakatabang sa saindang adbokasiya.
Pinahimutikan ninda Luistro asin Garin na an katuyuhan kan pagbalyo iyo an kontrolon an impluwensya ni dating Pangulong Gloria Macapagal-Arroyo sa partido o igwa ini nin koneksyon sa mga espekulasyon na posibleng salidahan ni House Speaker Bojie Dy si Vice President Sara Duterte kun sakaling mahatulan ini sa impeachment trial.
Segun ki Luistro, mayo siyang nahihiling na koneksyon sa pag-ultanan kan pagbalyo ni Sandro asin kan impeachment case.
Sinabi pa ni Luistro, na amay pa para pag-ulayan an posibleng masalida sa bise presidente mantang dai pa natatapos an paglilitis.
