Ikinaugma ni dating DOH Secretary Janette Garin an desisyon kan Sandiganbayan Special Second Division na nagpapawarang-sala saiya sa kasong graft asin technical malversation, o an ilegal na paggamit kan pondo kan gobyerno.
Ini konektado sa kontrobersyal na pagbakal kan 2015 nin mga bakunang Dengvaxia na nagkakahalaga nin P3.556 bilyong piso, bilang parte kan school-based immunization program kan Department of Health o DOH.
Kaiba man na pinawalang-sala sa kaso sinda dating DOH Undersecretary Gerardo Bayugo, Undersecretary Kenneth Hartigan-Go, OIC Director Joyce Ducusin, asin dating Philippine Children’s Medical Center Executive Director Julius Lecciones.
Personal na nag-atendir si Garin sa korte kan iluwas an desisyon, asin ipinahayag niya an saiyang kaugmahan sa naging hatol, na sinabing bako sana ini para saiya kundi para man sa mga Scientist, doktor, asin eksperto sa salud na nagsuporta sa programa kan pagbabakuna.
Nagin kontrobersyal an Dengvaxia program matapos punan an pagbabakuna sa mga estudyante sa mga pampublikong eskwelahan kan 2016, kun sain ginatos na ribong aki an nabakunahan bilang parte kan kampanya kan gobyerno kontra sa dengue.
Pangapudan man ni dating Department of Health (DOH) Secretary Janette Garin sa publiko na dai i-demonize an pagpapabakuna huli sa kontrobersiyang idinulot kan Dengvaxia program.
Pig-insistir niya, dapat na manaig an tamang impormasyon asin siyentipikong ebidensiya sa pagtalakay sa mga bakuna, lalo na sa usapin kan kaligtasan asin pagprotekta sa publiko laban sa mga helang.
