Pig-insistir ni Iloilo First District Representative Janette Garin na nagin politikal sana an isyu sa Dengvaxia, kasunod kan desisyon kan Sandiganbayan na ipawalang-sala siya asin an saiyang mga kapwa akusado.
Pinawalang-sala kan anti-graft court an dating kalihim kan salud sa mga kasong graft asin technical malversation manungod sa kontrobersyal na P3.55-bilyong procurement kan mga bakuna nin Dengvaxia kan 2015.
Sa intrevista kan Bombo Radyo Iloilo, ipinahiling ni Garin na ginibo sanang panakip-butas kan mga anti-vaccine na grupo asin kan saiyang mga kalaban sa politika an isyu kada may mga kapalpakan o kaduda-dudang pagbakal nin bulong sa Department of Health.
Idinugang kan mambabatas na napatunayan sa korte na mayong pondo an napunta sa saiyang bulsa, mantang nagtindog siya kaiba an labi 20 siyentista tanganing idepensa an integridad kan siyensiya asin an mga opisyal na dokumento kan saindang depensa.
Pig-insistir man niya na an nangyaring urulay nagtao nin grabeng epekto bako sana saiya kundi pati man sa mga doktor, mananaliksik, asin eksperto sa pampublikong salud na padagos na nag-aatubang sa hamon kan paglakop kan salang impormasyon.
Huli kaini, nanawagan si Garin sa komunidad kan mga eksperto na dai mawaran nin paglaom asin padagoson an saindang katungdan tanganing tuluyang maibalik an tiwala kan publiko sa mga bakuna asin sa pampublikong salud.
