(UPDATE) NAGA CITY- Mahigot na pigkondenar kan manhamiento kan 9th Infantry Division (ID), Philippine Army (PA) an ginibong pagdukot kan pigtutubudang mga miyembro kan rebeldeng New People’s Army (NPA) sa sarong daraga sa Lagonoy, Camarines Sur.
Sa entrevista kan Bombo Radyo Naga ki Capt. Ronnie Madriñan, Officer-in-charge (OIC) kan Division of Public Affairs Office (DPAO), sinaysay kaini na nagpapahiling na mayo ng respeto sa diretsos humanos asin nadadamay na man an mga sibilyan sa ginigibo kan mga rebelde.
Kinokondenar kan mga militar an pagdukot kan mga rebelde sa biktimang si Gladecel Gardoce.
Sigon sa opisyal, dae pa ninda nakakaolay an pamilya Gardoce asin an biktima huli naman sa pigsapo kaining trauma huli sa pangyayari.
Katakod kaini, tinawan doon ni Madriñan na padagos pa nanggad an mahigot na military operations na saindang pigkokondusir urog pa ngonyan na pigseselebrar kan makawalang grupo an saindang ika-49 anibersaryo.
Pigsierto man kan mga militar na mahigot nindang binabantayan an mga pwerang lugar urog na sa ikaapat na distrito kan probinsya tanganing masierto na salbado an mga residente digdi.
