NAGA CITY- Nagtitinir na problema sa probinsiya nin Camarines Norte an paggabat kan trapiko ngunyan na holiday season.
Sa entrevista kan Bombo Radyo Naga ki Rey Kenneth Oning, Municipal Councilor kan Labo, Camarines Norte, sinaysay kaini na inaabot sa haros 10 hasta 12 oras an biyahe palaog asin paluwas kan saindang probinsiya nin huli sa manlaen-laen na rason.
Sigun ki Oning kabali na digde an magabat na bulos kan mga lunadan sa may parte kan Quezon Province partikular sa banwaan kan Calauag asin Lopez kun saen inaabot nin pirang oras an mga biyahero.
An nasambitan kaya na lugar pig-aapod na Sungkaan Capital kan nasyon kun saen kadakol an mga lunadan na maluya an pag-usad huli man sa wala-toong pagpapakarhay kan mga lunadan.
Dugang pa kan opisyal, an problema na ini an dapat na matutukan orog na ngunyan na paparani na an kapaskuhan kun saen mas orog na madugang an nagba-biyaheng mga behikulo.
Mientrastanto, pig-orgulyo man ni Oning na disente asin marhay an mga tinampo sa Camarines Norte apwera na sana sa sarong lugar kun saen nairehistro dati an pagrasay nin daga kun saen padagos na pigpapakarhay an pig-aagihan kan mga behikulo.
Siringman, pigsaysay man kan opisyal na nakiulay na sinda sa mga bus company na magdugang nin bus units tanganing maakomodar an gabos na mga pasahero asin malikayan an darakulang problema.
Sa ngunyan, pigsierto na sana ni Oning na padagos an saindang pagbilog nin mga programa na makakatabang sa saindang mga nasasakupan ngunyan na kapaskuhan.
