Binatikos kan sarong abogado an estratehiya kan piskalya sa pagpresentar ki Atty. Michael Poa isip hostile witness sa Day 21 sa impeachment trial kontra kay Bise Presidente Sara Duterte.
Sa intrevista kan Bombo Radyo Naga ki Atty. Jojo Lacanilao – Former Spokesperson of Cj Maria Lourdes Sereno, sinabi kaini na dae siya uyon sa nasabing lakdang huli may peligro na dae makukua kan piskalya an mga piglalaoman kaining kasimbagan ki Poa.
Sa ibong kaini, sinabi ni Lacanilao na igwa pa man giraray nin nakuang mga importanteng testimonya an piskalya hale ki Poa, partikularmente sa mga paliwanag asin mga dokumento na inandam katakod kan Commission on Audit. Pig-aalegar na sa pag-usisa nagluwas na dae lubos na na-verify ni Poa an nagkapirang impormasyon na yaon sa saiyang inandam na paliwanag, na pwedeng gamiton kan piskalya tanganing kuestionon an kredibilidad kan nasabing dokumento.
Sa ibong kaini, sinabi ni Lacanilao na nagkaigwa nin negatibong epekto sa pagmansay kan publiko an hearing huli sa sunod-sunod na pagtumang hale sa depensa, na pinagkasunduan ni Senate President asin presiding officer na si Chiz Escudero. Sinabi niya na dawa nakakua nin testimonya an prosekusyon, mas naririsa kan publiko an mga pangyayari kun saen an mga kahapotan asin pahayag kan mga abogado kaini napugulan.
Pigkwestyon man ni Lacanilao an paggamit nin nagkapirang probokatibong pahayag asin tataramon arog kan “mastermind,” “scam,” asin “modus operandi.” Para sa abogado, mas maray na pabayaan na an mga ebidensiya testimonya mismo an magdara sa publiko sa mga senato-judges sa saendang conclusions imbes na maggamit nin mga pahayag na dagos na pwedeng i-challenge o strike out sa record.
Mientrastanto, sinabi ni Lacanilao na dae dapat awtomatikong makaapektar sa impeachment trial an separadong kaso kriminal asin warrant of the arrest laban ki Bise Presidente Duterte katakod kan grabeng huma. Sinabi niya na magkaiba an proseso asin standard kan ebidensiya sa impeachment asin criminal proceedings, dawa pwedeng konsideraron kan mga Senator-Judges an aram nindang impormasyon sa saindang sadiring pag-analisar kan kaso.
