Nanutaran ni Senator Grace Poe na mayo ng masyadong nagpapadara nin text scams ngunyan puon kan pigsugo ni Presidente Bongbong Marcos an pagpapauntok sa operasyon kan gabos nin mga Philippine Offshore Gaming Operators o POGO sa nasyon.
Sigun ki Poe, kapansin-pansin na maski antes pa ianunsyar kan Presidente an dapit sa POGO ban, nagtuninong na an mga nagpapadara nin text scams puon kan sunud-sunod an raid asin pagpapasarado sa mga ini.
Mas orog pang nagin pusog an pagtubod ni Poe na igwang kinaraman talaga an mga nag-o-operate nin POGO sa nasyon nin huli ta sa ibong kan pagsasabatas kan SIM Registration Act padagos pa man giraray sa pamamayagpag an text scams hasta sa maaraman an problema sa mga POGO.
An pahayag ni PBBM na ipinagbabawal na sa Pilipinas an gabos ka mga legal asin illegal POGOs an nagkaigwa nin dakulang impact o epekto pag-abot sa pagkabawas nin mga narereseber na text scams.
Alagad, nagpatanid man an Senadora na bako digde natatapos an problema huli ta posibleng maggibo nin paagi an scammers kun pano liwat na makapang biktima sa mga Pilipino sa ibang paagi.
Huli digde, pighurot kan senadora an tolos na pag-apruba kan prosopwestong ley na matuldok sa gabos kan POGO asin iba pang online gambling platforms na maraot sa publiko.
