NAGA CITY- Naobserbaran an paglangkaw kan presyo sa mga agricultural products sa banwaan kan San Fernando, Camarines Sur.
Sa entrevista kan Bombo Radyo Naga ki Allan Salvador, Municipal Agriculturist Officer kan nasambitan ng banwaan, sinaysay kaini na nanunutaran an paglangkaw sa presyohan kan mga barakalon nin gulay kawsa naman kan mga nag-aging kalamidad. Alagad an ibang mga commodities an dae man nagbago huli naman sa kasugoan kan DTI.
Sigun ki Salvador, saro pa sa saiyang nahihiling na karasonan an huli ta limitado an supply na naglalaog sa saindang merkado. Apwera pa digdi, magin an supply kan orig an nagkukulang naman kun kaya naglangkaw naman an presyohan kaini sa saindang banwaan.
Pigtawan linaw man ni Salvador na an nasambitan ng paglangkaw kan presyo sa nasambitan ng produkto an bakong huli sana sa nagraraning kapaskuhan.
Mientrastanto, mayo man nin nadadangog na agrangay an opisyal sa mga kunsomedores nin huli ta naiintindihan man kan mga ini an sitwasyon.
Katakod kaini, nangapodan man an opisyal sa mga paratienda na obserbaran an tamang pagtao nin presyo asin dae pagsamantalahon an papaabuton na kapaskuhan, siring man an pagsunod kan price regulatory kan DTI tanganing maski papano an makatabang sa saindang kapwa orog na ta haros gabos man naapektaran kan mga nag-aging kalamidad.
