NAGA CITY- Pigtawan duon kan sarong opisyal sa Barangay Sagrada, Pili, Camarines Sur na mas marhay pa man giraray an pagselebrar nin bagong taon na dae naggagamit nin paputok orog na an mga ipinagbabawal.
Sa entrevista kan Bombo Radyo Naga ki Rosa Bona, Barangay Kagawad, Comittee on Health kan Sagrada, Pili, sinaysay kaini na sa presenteng panahon mas marhay na maggamit na sana nin mga alternatibong pangparibok sa pagsabat kan bagong taon o pagselebrar kan kapaskuhan siring kan lata, sound system asin iba pa na mas salbadong gamiton kaysa sa paputok.
Sigun pa ki Bona, mahigot na pigbabantayan kan saindang lado an paggamit nin mga paputok orog na ta igwang papundunan na dapat 40 meters an rayo sa mga tawo kun enkaso mapaputok.
Dugang pa kan opisyal, kadalasan na nairerehistrong naggagamit nin boga iyo an mga kaakian alagad padagos man an saindang pagkaulay digde na bawal an siring na klase kan paputok.
Pig-orgulyo man kaini na sa mga nakalihis na taon kan pagselebrar nin kapaskuhan mayong nairehistrong naputukan kun kaya nagin matuninong asin salbado an gabos.
Sa ngunyan, hagad na sana liwat kan opisyal an kooperasyon kan gabos para sa pagmantinir kan paz y orden sa panahon nin kasiributan.
