NAGA CITY- Nagin matuninong an pigkundusir na selebrasyon katakod kan Valentine’ Day sa banwaan nin Libmanan, CamSur.
Sa entrevista kan Bombo Radyo Naga ki PCMS Juan Batolina, PIO/Spokesperson kan Libmanan MPS, sinaysay kaini na sa ibong kan manlaen-laen an aktibidad na pigsagibo siring kan Miss Gay beauty pageant na iyo man an pinaka-highlight kan event kun saen pinagpartisiparan ini kan mga contestant na gikan sa pagtaraid na probinsiya o lugar, mayong nairehistrong anuman na kariribukan.
Sigun pa ki Batolina, nagin marhay man soboot an panahon kun kaya mayong naging aberya an mga activities siring na sana kan mass wedding, job fair asin iba pa.
Katakod kaini, tanganing masierto na magigin salbado an nasa 3-K hasta 5-K na tawo na nagpasiring sa saindang lugar, nagdeploy an saindang hepatura nin kadakol man na mga personahes orog na sa mga pinagdadausan kan mga event.
Dakulang katabangan man an mga baragay tanod na saindang nakaibahan siringman an pakikisumaro kan publiko sa saindang piglatag na panundon tanganing malikayan an anuman na insidente.
Sa ngunyan, pigsierto na sana kan opisyal na padagos an mga programa na saindang ginigibo tanganing mamantinir an paz y orden sa saindang banwaan siring na sana kan padagos na pagkundusir nin Police Visibility asin pagpapahigot ka police presence.
