Binigyang diin ng Municipal Agricultural Officer ng Lokal na Gobyerno ng San Fernando, Camarines Sur gitna ng patuloy na pagtaas ng presyo ng krudo bunsod ng tensyon sa Middle East, partikular sa Iran at Israel, ramdam ang domino effect sa lokal na ekonomiya—mula sa pamasahe, presyo ng mga bilihin, hanggang sa gastusin ng mga magsasaka.
Sa panayam ng Bombo Radyo Naga kay Allan Salvador, Municipal Agricultural Officer ng LGU San Fernando, sinabi nito na upang maibsan ang epekto, nagpatupad ang lokal na pamahalaan ng fuel subsidy program para sa mga rehistradong parauma. Sa kasalukuyan, nasa 10 litro ng krudo ang naipamahagi sa mga nakapagparehistro sa opisina ng agrikultura. Target ng programa ang humigit-kumulang 100 magsasaka, ngunit limitado pa ang pondo.
Samantala, ang Department of Agriculture ay may umiiral na fuel subsidy na nagkakaloob ng ₱3,000 kada benepisyaryo, na inaasahang tataas sa ₱5,000. Sa kabuuan, mahigit 500 magsasaka ang nakinabang sa naturang ayuda. Ang pagpili ng benepisyaryo ay nakabatay sa RSBSA (Registry System for Basic Sectors in Agriculture).
Bukod sa subsidiya, pinapayuhan naman ng opisyal ang mga magsasaka na magpatubig nang maayos, lalo na sa mga lugar na umaasa lamang sa ulan, at mag-avail ng crop insurance upang may proteksyon laban sa peste at matinding init ng panahon.
Dagdag pa rito, hinihikayat ang mga farmers’ association na makipagtulungan sa mga kooperatiba na may makinaryang gaya ng harvester at dryer, upang makakuha ng mas mababang service fee kumpara sa pribadong sektor.
Sa kabuuan, bagama’t limitado ang pondo, nananatiling mahalaga ang koordinasyon ng lokal na pamahalaan, Department of Agriculture, at mga samahan ng magsasaka upang matugunan ang pangangailangan sa panahon ng krisis sa krudo.
