NAGA CITY- Dae kukunsintihon kan barangay council kan Caroyroyan, Pili, Camarines Sur an mga tawong nagsasagibo nin illegal logging sa saindang banwaan.
Sa entrevista kan Bombo Radyo Naga ki Jerry Canave, kapitan kan nasambitan ng lugar, sinaysay kaini na nagtutubod ini na bakung mga sararadit na mga residentes an nagsasagibo nin siring na iligal na pagpuputol nin mga kahoy sa mga kagubatan.
Dugang pa kan opisyal na saro ini sa saiyang mga pinagbabantayan alagad pig-ako man kaini na igwa pa man giraray nin mga nakakalusot orog na ta baku man talaga an saindang mga residentes an harani asin nakakahiling kaini.
Katakod kaini, pangapudan man ni Canave sa lambang saro na makanuod na magtanom nin kahoy.
Alagad, mas makakamarhay soboot na baku na sa mga gilid kan tinampo huli ta makakadugang sana ini sa peligro para sa mga motorista.
Mas makakamarhay na sa pamitisan na sana kan Isarog isagibo an mga siring na tree planting activities tanganing mapangatamanan an lambang residentes.
Ini huli ta an kawaran nin puon kan kahoy sa mga kagubatan an posibleng magdara nin dakulang peligro sa lambang komunidad orog na sa pamitisan kaini.
