Ipigbuyagyag kan testigo na an mga pangaran kan mga soboot benepisyaryo kan confidential funds kan Office of the Vice President (OVP) asin kan Department of Education (DepEd) nagtugma sa record kan mga nagadan na indibidwal asin kaakian sa Philippine Statistics Authority (PSA).
Ini an pigbuyagyag ni PSA Assistant National Statistician Marizza Grande sa nagpapadagos na impeachment trial ki Bise Presidente Sara Duterte. Sigon ki Grande, kabale sa mga pangaran na nakasurat sa mga resibo kan acknowledgement iyo si Marlin Sunga, na iyo suboot an nagpirma sa mga dokumento. Alagad, base sa saiyang sertipiko nin kagadanan, si Sunga nagadan kan Nobyembre 1965, sa edad na duwang bulan pa sana.
Susog ki Grande, si Sunga gadan na kuta sa laog nin haros 57 taon kan taon 2023, kan an mga dokumento soboot ginamit para sa mga kompidensyal na pondo.
Mientrastanto, nagpresentar nin acknowledgement receipts an private prosecutor na si Mae Divinagracia ni Fortunato Salig na nagkakantidad nin 200,000 pesos, Emilio Sagan na nagkakantidad nin 70,000 pesos, asin Rodolfo Traya na nagkakantidad nin 120,000 pesos. An gabos na resibo may petsang 2023.
Sinabi man ni Grande na igwang mga death certificate na nagtutugma sa pangaran ni Salig, Sagan, asin Traya. Susog sa PSA, si Salig nagadan kan Hunyo 2011, si Sagan kan Hulyo 2015, asin si Traya kan Mayo 2021—mga taon bago an saindang mga pangaran nagluwas sa mga resibo nin pagmidbid na may petsang 2023.
