Nahihiling kan sarong Financial Analyst an Pax Silica komo sarong mayor na oportunidad para sa ekonomiya kan Pilipinas, orog na sa lado kan artificial intelligence, semiconductors asin iba pang modernong teknolohiya.
Sa intrevista kan Bombo Radyo Naga ki Rogel P. Morales – Financial Analyst, sinaysay kaini posibleng umabot sa 40 hasta 70 bilyones dolyares an puhunan na pwedeng makalaog sa nasyon, mantang kinakarkulong 130,000 hasta 190,000 na direktang trabaho an pwedeng mamukna para sa mga Pilipino, partikular na an mga skilled workers.
Segun ki Morales pwede man na makakolekta an gobyerno nin pigkakarkulong P180 bilyones na buwis kada taon, apwera sa mga oportunidad para sa mga negosyo asin trabahador na masuplay nin mga produkto asin serbisyo sa proyekto.
Alagad, minimidbid man an mga kahaditan manungod sa dakulang pangangaipo para sa kuryente, tubig, daga asin posibleng epekto sa kapalibutan. Tinawang-duon ni Morales na dapat pag-adalan asin atubangon an mga peligrong ini sa paagi nin tamang pagplano asin makusog na negosasyon tanganing maprotehiran an interes kan Pilipinas.
Nagtutubod si Morales na pwedeng magin long-term asset kan nasyon an Pax Silica kun ipapautob nin tama. Pig-engganyar man kaini an mga jovenes na pauswagon an saindang kakayahan sa teknolohiya, engineering, IT asin iba pang larangan na posibleng kaipuhan sa mga trabahong mamukna kan proyekto.
