Piglunsar ni Presidente Ferdinand Marcos Jr., an Agri-Puhunan at Pantawid Program kan gobyerno kan Biyernes kan bisitahon kaini an probinsiya nin Sarangani sa Mindanao na inisyatiba kan Department of Agriculture (DA) asin Development Bank of the Philippines (DBP).
Obheto kan programa na matabangan an satuyang mga paraoma, na pigkokonsiderar kan Punong Ehekutibo na harigi kan ekonomiya kan nasyon nin huli sa importanteng papel ninda sa pagkamit kan seguridad sa pagkakan kan nasyon.
Tinawan duon kan Presidente na dinisenyo an nasambitan ng programa tanganing masimbagan an mga angat na kinakahampang kan sektor nin agrikultura, partikularmente an halangkaw na interes sa mga pautang, limitado an access sa abot-kaya asin de kalidad na gamit sa pag-oma.
Sigun sa Presidente, maninigong tawan nin pagbisto an mga paraoma huli ta an saindang pawis asin kapagalan an nagsusustenir sa sektor nin agrikultura.
Sa irarom kan Agri-Puhunan asin Pantawid Program, an mga paraoma puwedeng mangutang nin maabot sa P60,000 sa hababang taonan na interes na 2 por ciento.
An pagbayad pwedeng gibohon sa paagi kan pagpabakal kan saindang mga ani sa National Food Authority (NFA) o sa mga DA-accreditted cooperatives.
Sa irarom kan Pantawid program, tinawan an mga benepisyaryo nin P8,000.00 bulanan na cash assistance tanganing magamit mantang naghahalat kan saindang aanihon.
Pigsierto kan Presidente sa mga paraoma na preparado an gobyerno na tabangan sinda asin dangugon an saindang mga agrangay.
Tinawan-duon pa kaini an mga complimentary programs kan gobyerno siring kan Rice Competitiveness Enhancement Fund (RCEF) kun saen 17,763 na paraoma asin 331 cooperativas an benepisyaryo kan nakalihis na taon.
