NAGA CITY- Nakumpiskar kan mga otoridad an nagkapirang pakete nin pigtutubudang pekeng mga sigarilyo sa operasyon na piglunsar sa banwaan nin Pollillo sa probinsya nin Quezon.
Sa nakuang impormasyon kan Bombo Radyo Naga, napag-araman na pasado alas-2:30 nin hapon kan enot na pigkondusir an operasyon kan PNP Pollilo sa Polillo Port na nagresulta sa pagkakadakop kan duwang suspek na binistong sinda Asri Abdul, 27-anyos asin si Mateo Areglado, 20-anyos.
Nakumpiskar sa mga ini an tolong reams asin 11 pakete nin Marlboro asin 11 pakete nin Fortune.
Mientrastanto, naarestar man kan mga otoridad sa pigkondusir na operasyon pasado alas-4:30 nin hapon sa parehong lugar an negosyanteng si Imelda Puchero, 52-anyos.
Narekober saiya an sampulong ream nin sigarilyong Mighty na nagkakantidad nin poko mas umenos P3,200.
Susog sa PNP Polillo, pigpapabakal kan nasambitang mga suspek sa baratong kantidad an pekeng mga sigarilyo sa manlaen laeng mga tindahan sa lugar.
Sa ngonyan, nagtitinir na sa kostudiya kan mga otoridad an nasambitang mga suspetsado mantang inaandam na an kasong isasangat laban sa mga ini.
