NAGA CITY- Pigreklamo kan sarong ABC President an nagkapirang mga miyembro kan Highway Patrol Group (HPG) makalihis na mangutong sa Libmanan, Camarines Sur.
Sa ekslusibong entrevista kan Bombo Radyo Naga ki Coun. Jose San Buenaventura, ABC president sa banwaan nin Libmanan, sinaysay kaini na kinotongan kan nagkapirang mga personahe kan HPG na nagkondusir nin checkpoint sa barangay Potot sa nasambitang banwaan an saiyang driver na mabakal kuta na nin hollow-blocks.
Suruon-suon suboot na bayolasyon an pigtao kan HPG asin pinapabayad pa an saiyang driver nin P5,000 na multa.
Sigon ki San Buenaventura, huli sa mayong darang dakulang kantidad nin kwarta an saiyang driver, solamenteng an P2,000 na pambakal sana nin hollow blocks an pighagad na bayad kan HPG asin mayo suboot an mga ining pigtaong ticket o resibo.
Katakod kaini, pinag-aadalan na kan konsehal kun masunad siya nin kaso laban sa nasambitang mga personahe kan HPG-Camarines Sur.
Mientrastanto, sigon man ki P/Supt. Jefferson Araojo, hepe kan PNP Libmanan, sinaysay kaini na mayong koordinasyon sa saindang opisina an pigkondusir na checkpoint kan HPG.
Binisto sana sa pangarang PO1 Oco asin SPO2 Taday an pigrereklamong mga personahe kan HPG na imbwelto suboot sa pangungutong sa driver ni San Buenaventura.
Sa ngonyan, nagkondusir na kan saindang sadiring imbestigasyon an PNP katakod kan nasambitang pangyayari.
