Pigbatikos ni House prosecutor asin Ako Bicol Partylist Rep. Jil Bongalon an petisyong pigsunad kan na-impeach na si Vice President Sara Duterte sa Korte Suprema (SC) tanganing pugulan an pigsasagibong impeachment trial kan Senado.
Sigun ki Bongalon ini an maikokonsiderar na desperadong lakdang, asin an kaenut-enuting na-impeach na opisyal na naghagad tabang sa Mataas na Hukuman tangani sanang ipauntok an paglilitis.
Pigsaysay ni Bongalon, imbes na atubangon asin idepensa an sadiri sa impeachment court, mawot ni Duterte na ulangan an paglilitis, na nagpapahiling nin kaluyahan kan saiyang depensa.
Ipinunto man ni Bongalon na sa historya kan impeachment sa Pilipinas, mayo pang na-impeach na opisyal an nagtangkang ipa-untok an proseso sa paagi kan Korte Suprema.
Sigun pa ki Bongalon, malinaw an estratehiya kan Bise Presidente, ini an pugulan an proseso antes pa ini magpuon, imbes na atubangon ini sa Senado asin simbagan an mga akusasyon kontra sa saiya.
Ipinaliwanag man kan kongresista gikan sa Bicol na an impeachment, bakong sarong judicial process kundi sarong mekanismo kan political accountability na ipinagkatiwala sana sa Kongreso.
Pauru-utro nang nag desisyon an Korte Suprema na an impeachment ay dae man saklaw kan judicial review, kaya man bako sanang desperado an lakdang ni Duterte kundi maluya man sa legal na pundasyon.
Nagpatanid man si Bongalon na kun itao kan Korte Suprema an petisyon ni Duterte, posibleng magbukas ini nin bakong marahay na halimbawa kun saen an mga masunod na na-impeach na opisyal an pwede nang lumaktaw sa Kongreso asin maggamit nin hudikatura komo panangga kontra sa paninimbagan.
Liwat na pighurot ni Bongalon na an impeachment sarong mekanismong pigtalaan sa Konstitusyon tangani na masierto na mayo nin opisyal kan gobyerno an nakakalabi sa ley.
An pagtugot sa panlalaog kan hudikatura an maraot sa separation of powers asin magpapaluya sa mga demokratikong institusyon.
Pig inkaminar kan House prosecutor si Duterte na atubangon an proseso imbes na maggamit nin mga technical strategy tangani ulangan an paglilitis.
