NAGA CITY-Nag-apelar an anti-smoking group na Philippine Smoke-Free Movement (PSFM) sa gobyerno na magsagibo nin mas maray na mekanismo tangani na ma-protehiran an mga jovenes gikan sa huma kan paggamit nin vape asin e-cigarettes.
Ini kasunod kan kaenot-enoting mortality na nairehistro sa nasyon dai pa nahaloy huli sa E-cigarette or Vaping Use-associated Lung Injury(EVALI).
An biktima saro man nin 22-anyos na lalake.
Sa sarong patara-tara pigsambit kan PSFM na kaipuhan nin magkaigwa o maglatag nin mga polisiya na mabawal sa mga jovenes na mag-gamit nin vape asin iba pa nin kaparehong produkto.
Sigun ki PSFM Lead Coordinator Rizza Duro, an kampanya laban sa paggamit nin mga nicotine-based products dapat orog pang pahewason tangani na maprotehiran an kapakanan kan mga jovenes.
Basado soboot sa monitoring kan PSFM, nagin malamya an implementasyon kan advertising ban, orog na online.
Imbes na mapundo an mga jovenes, orog soboot sindang na-eenkaminar na mag-gamit kaini huli na man sa manlaen-laen nin mga vape flavor na nagkukuriyat ngunyan.
Marurumduman na kan nakaaging bulan pigbareta kan Department of Health an pagkagadan kan nasambitang biktima.
Mientrastanto basado sa report kan Global Youth Tobacco Survey(GYTS) kan 2019, dagos-dagos an paglangkaw kan paggamit kan mga jovenes nin vape kun saen gikan sa 11.7% kan 2015 nagsakat ini sa 24.6% kan 2019.
