Padagos an mahigot na pagirumdom kan Philippine Institute of Volcanology and Seismology sa mga kahimanwa na nag-iistar sa harani na lugar kan Bulkang Taal na magin mapagmatyag asin man padagos na maglikay huli man sa padagos na pagpapahiling kan aktibidad kan bulkan sa mga nakalihis na aldaw.
Basado kaya sa pinakahuring report kan ahensya, an nasambitan ng Bulkang Taal an padagos na nagluluwas nin mga visible gas plumes o usok gikan sa mayor na bunganga kaini.
Sa nakalihis kaya na magdamlag , nairehistro an pagbuga kan pigkakarkulong 4,514 tonelada kan sulfur dioxide.
Apwera pa digde, naobserbaran man an makusog na pagsingaw o steaming activity na nagpapakol man sa pigkakarkulong 2,100 metro an langkaw gikan man sa nasambitan ng bulkan.
Katakod kaini, nakapagrehistro man an PHIVOLCS nin tulong volcanic earthquakes.
Kabali na digde an sarong nagpapadagos na volcanic tremor event, na nagpuon pa kan nakalihis na ika-27 kan Agosto, 2025. Ini an nagpapahiwatig na may paghiro pa man sa irarom kan nsambitan ng bulkan.
Susog pa sa mga naguno na datos, nanutaran na an mayor na bunganga kan bulkan an nagpuon ng magpahiling nin pagkusog kan pagbuga nin usok kan nakalihis na ika-29 kan bulan nin Agosto.
Padagos man na minomonitor kan PHIVOLCS an sitwasyon tangani maasegurar an kasalbaduhan kan mga komunidad na harani sa bulkan.
Sa presente, nagtitinir pa man sa Alert Level 1 an Bulkang Taal. Huli man digde, padagos pa na pinapatanidan kan PHIVOLCS an publiko na likayan an pagpasiring pa sa Taal Volcano Island.
