NAGA CITY- Nagpapadagos an pigkukundusir na Business One-Stop Shop sa banwaan kan Bato, Camarines Sur.
Sa entrevista kan Bombo Radyo Naga ki Senior Fire Officer 4 Melchor Villanueva, Officer in Charge kan BFP-Bato, sinaysay kaini na nagpuon an nasambitan ng Business One Stop Shop kan nakalihis na Lunes, Enero 6 asin madurar hasta Enero 29, 2025.
Katakod kaini, pigheras man kan opisyal na nagpuon na an saindang bagong sistema sa pag-renew nin negosyo kan mga business owners.
Ini an sa paagi kan online transactions kun saen pigpaparekas an pagkua kan mga dokumentos na kinakaipuhan kan mga negosyante sa tabang man kan saindang mga personahe.
Para man soboot sa mga makua kan fire safety inspections certificate, igwang inspector na ma-inspeksyon sa mga establishment asin kun mayong rekomendasyon marekas na maitatao an nasambitan ng certificate.
Sa ngunyan, pig-enkaminar na sana kaini an gabos na mga business owners sa saindang banwaan na mag-avail kan nasambitan ng Business One-Stop Shop.
