Opisyal nang nagin ika-71 miyembro an Pilipinas kan Coalition for Disaster Resilient Infrastructure (CDRI) kasunod kan pakikipagpulong ni Presidente Ferdinand Marcos Jr. sa mga opisyal kan grupo sa New Delhi, India.
Katuyuhan kan CDRI na tabangan an mga nasyon na pakusugon an saindang mga imprastraktura kontra sa mga kalamidad asin epekto kan climate change.
Bilang miyembro, makikinabang an Pilipinas sa kaaraman, teknikal na suporta, asin eksperyensya kan ibang nasyon sa pagtogdok nin mas matitibay na kalsada, tulay, pantalan, asin iba pang imprastraktura.
Makakatabang man ini sa pagkuha nin pondo para sa mga proyektong nakasentro sa disaster-resilient infrastructure.
An CDRI inilunsar kan India kan 2019, asin an Pilipinas an ikaduwang nasyon sa Southeast Asia na nagbali, kasunod kan Vietnam.
Segun ki Presidential Communications Office (PCO) Acting Secretary Dave Gomez, mahalaga an pagigin miyembro kan Pilipinas sa CDRI orog na ta padagos na nararanasan kan nasyon an nagroromdom na epekto kan climate change.
