NAGA CITY- Piglalaoman na madagsa an haros na sa milyong mga deboto tanganing magbisita sa pinaka-dinadayong simbahan sa Calabanga, Camarines Sur tanganing makisumaro sa isasagibong Alay lakad katakod kan pag-obserber sa Mahal na Araw.
Katakod kaini, nakapreparar na an Our Lady Of La Porteria Parish Church katuwang an mga uniformed personnel, local health unit, Barangay Pastoral Councils, at Incident Management Team para sa pagdagsa kan mga deboto asin mga peregrino.
Sa paghampang sa mga kagawad kan media ni Fr. JR Bañal, Parochial Vicar kan Our Lady Of La Porteria Parish Church, sinaysay kaini na kada aktibidad na saindang pigkukundusir, pinapaaram soboot ninda ini sa lokal na gobyerno kan Calabanga tanganing maging well-coordinated sinda sa iba pang mga ahensya.
Sigun man sa pagkarkulo kan Local Government Unit, piglalaoman an nasa milyon na mga deboto sa obserbasyon kan Holy Week puon palm sunday hasta sa resurrection sunday. Ini kaya soboot an mga aldaw na talagang pigdadagsa kan mga tao an lugar tanganing magbisita sa saindang simbahan asin sa Hinulid Chapel sa Santa Salud, Calabanga. Siringman an mga deboto na maiba sa Alay Lakad.
Apwera soboot sa mga Bikolano, may mga pilgrims man na gikan pa sa ibang lugar an nagbista na sa parokya.
Mientrastanto, inabisuhan man kaini an mga media asin vloggers na maantendir asin magamit kan mga drones, na apwera sa lisensya kaini, kaipohan man ining iparehistro nin huli ta igwa soboot nin mga rules and regulations na ipapautob.
Sa ngunyan, nagtitinir soboot na bukas an simbahan para sa iba pang mga relihiyon tanganing maeksperyensiyahan man kan mga ini kun pan-o pigsasagibo kan katoliko an selebrasyon kan semana santa.
