Kinalampag kan pirang mga senador an Philippine National Police (PNP) na tutukan an nakakaalarmang paglangkaw kan kaso nin kidnapping sa nasyon.
Patanid ini ni Senator Ronald “Bato” dela Rosa, kun dae maaagapan an kidnapping cases sa nasyon an sierto na makakaraot ini sa imahe asin sa ekonomiya kan nasyon.
Tinawan-duon ni Dela Rosa na konektado man sa Philippine Offshore Gaming Operators (POGO) o bako an mga kaso kan kidnapping dapat ining maresolbaran tulos nin huli sa maraot na epekto sa bilog na nasyon.
Dugang pa kaini, imbes na magbali sa urulay politika an PNP, mas makamarhay na tutukan kan PNP an naglalangkaw na kaso kan kidnapping.
Mientrastanto, sinaysay man ni Senator Sherwin Gatchalian na dapat na magimbal an mga alagad sa batas huli sa pagbabalik kan kidnap-for-ransom.
An kaipohan soboot digdi an marekas na paghiro kan mga otoridad sa pagtugis kan mga nasa likod kan krimen antes pa sinda liwat na makapangbiktima.
