Kinumpirma kan Philippine National Police (PNP) na nakaresibi sinda nin mga apod poon kan ilunsar ninda an hotline para sa marikas na paghanap ki Senador Ronald ‘Bato’ Dela Rosa.
Segun ki Lt. Gen. Wilson Joseph Lopez, PNP deputy chief for administration, mahigot nindang sinasala an lambang apod asin biniberepika nin marhay.
Maski an mga lugar na posibleng kinaroroonan kan Senador, mahigot nindang binabantayan tanganing tulos na maaresto ini.
Dai man ikinaila kan opisyal kan pulisya na igwa sindang mga koneksyon sa manlaen-laen na ahensya arog kan Armed Forces of the Philippines (AFP) para sa marikas na pag-aresto sa puganteng Senador.
Dawa padagos an manhunt, mas pinili kan PNP na sumuko na sana an Senador tanganing malikayan an ano man na engkuwentro.
