Nangapudan an Philippine National Police-Anti-Cybercrime Group (PNP-ACG) sa mga mambabatas na amyendahan an SIM Card Registration Act.
Segun sa direktor kan PNP-ACG na si Maj. Gen. Wilson Casil Asueta, kadaklan sa mga kaso nin cybercrime sa nasyon may kalabot pa man giraray na subscriber identity modules o SIM cards.
Bakong epektibo an nasabing ley kun kaya importante para sa mga mambabatas na magpasar nin mas makusog na bersyon kan nasabing ley.
Nagkapira sa mga itinaong halimbawa kan opisyal kan pulis katakod kan paggamit nin SIM card iyo an scamming, online gambling asin identity exploitation.
Sinabi niya na sa presenteng ley, nadidipisilan sindang mag-monitor kaini huli sa dakol na nawawarang probisyon kabali na an SIM Card Registration Act.
Nagkapira sa mga bagay na pigtutulod kan PNP-ACG iyo an identity authentication asin activation kan SIM cards pakatapos sana kan authentication asin registration.
Marurumduman na pinirmahan ni Presidente Ferdinand Marcos Jr. an SIM Card Registration Act o Republic Act 11934 na nagtatao nin liability sa paggamit nin SIM Card sa krimen asin makakatabang sa mga awtoridad na marikas na mabisto an mga nagsasagibo nin krimen.
