NAGA CITY- Pinag-aandam ngonyan kan mismong regional director kan Police Regional Office (PRO) 5 an gabos na mga kapulisan sa Camarines Sur katakod kan posibleng opensiba suboot na gigibuhon kan rebeldeng New People’s Army (NPA) sa probinsya antes pa an ikaduwang State of the National Address (SONA) ni presidente Rodrigo Duterte.
Sigon ki PNP Bicol director PC/Supt. Antonio Gardiola, Jr., inapudan siya ni PNP Chief Dir. Gen. Ronald dela Rosa asin sinaysay na nakaresibe sinda nin impormasyon manungod sa ilulunsar na major offensives kan mga NPA antes pa an SONA kan hepe ehekutibo.
Katakod kaini, tulos man na pigpatanidan ni Gardiola an hepe kan gabos na mga PNP Stations sa probinsya nin Camarines Sur na magtenir na alertado tanganing mayong mangyaring anumang kariribukan sa nasambitang lugar.
Sigon pa ki Gardiola, nakatalaan na isairarom sa full alert status an rehiyong Bicol antes pa an SONA ni Presidente Duterte.
