NAGA CITY – Paglalapigutan soboot kan bagong Provincial Director kan Camarines Sur Police Provincial Office na magin drug free an bilog na Camarines Sur.
Sa nagin paghampang sa mga kagawad kan media ni PCOL. Virgilio Olalia, Provincial Director kan CSPPO, sinaysay kaini na ipapadagos asin mas papahiguton pa kan saindang lado an mga pigsasagibong kampanya kontra iligal na droga tanganing maabot an saindang obheto na magin drug free an bilog na probinsiya.
Katakod kaini, pinasalamatan man kan opisyal an nagin kapahayagan ni Governor Luigi Villafurte na matao soboot ini nin reward enkaso an sarong lugar an magin drug free.
Sigun ki Olalia, mas magigin inspirado an mga kapulisan kan CSPPO na gibuhon an saindang trabaho nin huli ta yaon asin namamatean soboot ninda an suporta kan Provincial Government kan Camarines Sur.
Pigpromesa man kan opisyal na mas hihigusan kan saidang lado an pagtatrabaho asin pigsierto na an gabos na barangay an nagsasairarom sa pagmomonitor kan mga kapulisan.
Katakod digde, pighagad man ni Olalia an tabang kan mga stakeholders, media asin mga residentes tanganing magin posible asin magin matrayumpo an anuman na programa na saindang ilalatag.
Sa ngunyan, pigsierto na sana kan opisyal na yaon an saindang 100% na commitment tanganing mamantinir an paz y orden sa bilog na Camarines Sur.
