Gagamiton kan Philippine National Police (PNP) an dugang na panahon tanganing mas pakusugon an saindang pagpreparar sa seguridad para sa masunod na eleksyon sa Barangay asin Sangguniang Kabataan (SK), na nakatalaan na sa Nobyembre 2028.
Segun ki PNP Chief Gen. Jose Melencio Nartatez Jr., importante na gamiton an pagpa-oktaba kan eleksyon tanganing repasuhon an mga nagin lakdang kan pulisya sa nakaaging mga eleksyon asin maaraman an mga dapat pang pagrahayon.
Sa irarom kan Republic Act No. 12326 na pinirmahan ni Presidente Ferdinand Marcos Jr. kan Setyembre 24, ipinagpapa-oktaba an Barangay asin SK elections poon Nobyembre 2, 2026 pasiring sa Nobyembre 13, 2028.
An bagong petsa kan eleksyon anom na bulan pagkatapos kan Mayo 8, 2028 Presidential asin General Elections.
Segun ki Nartatez, gagamiton man kan PNP an mas halawig na panahon tanganing mapreparar an saindang mga tauhan asin mapakusog an koordinasyon sa Commission on Elections (Comelec), mga lokal na gobyerno asin iba pang ahensya.
Magsisirbi man na basehan kan PNP an saindang eksperyensya sa Setyembre 2026 Bangsamoro Autonomous Region in Muslim Mindanao (BARMM) parliamentary elections, na tinantya ninda na nagin pankagabsan na matuninong asin maayos.
Mantang, nagprepreparar man an Comelec na buksan giraray an voter registration kasunod kan pagpapaliban kan barangay asin SK elections.
Segun ki Comelec Chairperson George Erwin Garcia, piglalaoman na madakol an magparehistro, siring man an mga botanteng gustong maglipat o magpaaktibo giraray kan saindang voter registration huli sa mas halawig na panahon bago an masunod na eleksyon.
